Maak die tarentaal skoon en laat dit vir ’n week in Griekse jogurt marineer.
6 porsies
* 1 tarentaal
* 1 houer (800 g) Griekse jogurt
* 4 lourierblare
* 5 ml gemengde speserye
* 2,5 ml kaneel
* 2,5 ml neutmuskaat
* 2,5 ml naeltjies
* 7 peperkorrels
* 2 uie, fyngekap
* 250 g sampioene
* 1 hoender-aftrekselblokkie
* 125 ml room
* 125 ml melk
* 1 pakkie beesstert- soppoeier
* 1 houer/boks (500 g) fillodeeg
* kweperkonfyt, om voor te sit
Kook gemarineerde tarentaal, lourierblare en alle speserye stadig in water in ’n groot kastrol vir sowat 5 uur. Hou dop sodat dit nie droogkook nie. Laat afkoel, ontbeen en sny tarentaal op in stukke. Verwyder peperkorrels. Braai uie tot glaserig, voeg sampioene by en braai tot bruin. Voeg tarentaal en aangemaakte hoender-aftreksel by en kook tot vleis uitmekaar val. Meng room, melk en soppoeier by en kook tot droog. Laat afkoel. Maak fillodeeg-pakkies met die vleismengsel in en verkoel in die yskas vir sowat 2 ure. Verhit oond tot 200 °C. Bak afgekoelde pakkies vir sowat 20 minute. Maak kwepersous van kweperkonfyt en water – verhit dit saam. Gooi onder-in ’n opskepbak en plaas fillopakkies bo-op om voor te sit. Jy kan kweperskywe rondom pak vir die mooi as jy dit het.
of
Gestoofde tarentaal (Bedien 3-4 mense)
Hierdie dis is gemaak tydens ons negentiende-eeuse-onthaal in ‘n verepaleis in Oudtshoorn. Die idée was om ‘n dis te maak wat gewild was gedurende die tyd van oorvloed geld in die volstruisdorp.
1 tarentaal, in porsies gesny
sout en peper, na smaak
½ k meel
250g botter
4 naeltjies
4 wonderpeperkorrels
2 lourierblare
1 e gemaalde koljander
2 e blatjang
‘n handvol rosyntjies
1 k hoenderaftreksel
½ k rooiwyn
2 heel wortels
knippie gerasperde neutmuskaat
Strooi die tarentaalporsies met sout en peper en rol in die meel. Verhit die botter in ‘n pot en braai tot bruin. Voeg die naeltjies, wonderpeperkorrels, lourierblare, koljander, blatjang, rosyntjies, hoenderaftreksel, rooiwyn en heel wortels by. Sit die deksel op en laat stadig stowe tot sag (3 – 4 ure). Voeg dan die gerasperde neutmuskaat by. Bedien saam met gebakte kwepers*, stysel en groente van jou keuse.
*Gebakte kwepers
6 kwepers, skoon geskrop, gehalveer en ontpit
Week in water met ‘n bietjie suurlemoen terwyl sous gemaak word
Kook saam:
750 ml rooi jerepigo of muskadel
300 ml water
500 g suiker
1 kaneelstokkie
2 lourierblare
2 heel naeltjies
Plaas kwepers op ‘n bakplaat. Bedek met sous en maak toe met foelie. Bak ongeveer 2 uur teen 160 ˚C of tot sag. Bak laaste halfuur onbedek.
Maak toe wanneer dit afkoel om die kleur te behou.
Groete Lizahn
Tarentaal
