Krummellaagpoeding met pere, piesangs en rum

Bereidingstyd: 25 minute
Baktyd: 35 minute
Oondtemperatuur: 180 °C
180 ml (120 g) koekmeel
5 ml bakpoeier
10 ml fyn gemmer
100 g haselneute, gerooster
160 ml (160 g) koue botter, in blokkies gesny
185 ml (150 g) suiker
125 ml rum
4 pere
3-4 ferm, ryp piesangs, in dik skywe gesny

1 Voorverhit die oond. Smeer 'n vuurvaste oondskottel met botter.
2 Sif die meel, bakpoeier en gemmer saam. Kap die haselneute fyn in 'n voedselverwerker en gooi dan die meel by die haselneute.
3 Gooi 100 ml (100 g) van die botter en 125 ml (100 g) van die suiker by en pols die bestanddele tot net-net gemeng.
4 Verhit die orige 60 ml (60 g) botter in 'n kastrolletjie tot gesmelt, gooi die orige 60 ml (50 g) suiker by en roer dit totdat dit gemeng is en begin karamelliseer. Haal dit van die plaat af en roer die rum by.
5 Skil die pere, raak ontslae van die harde stronke en pitte en sny elkeen in dik skywe. Gooi die peerskywe by die rumsous en roer totdat dit met die sous bedek is. Skep die piesangskywe in die voorbereide oondskottel, skep die peerskywe tussenin en skraap die sous wat in die kastrolletjie agterbly, eweredig bo-oor.
6 Skep die krummellaagmengsel bo-oor en bak dit vir 35 minute of tot bros en goudbruin.